Ram tin ah

1.Hmarchhak tlang hmun sang ah,

   Meichher hmun zim te lek atangin;

   Hnam meichher chu engzual zelin,

   Lo thangchhuak se,ram tinah.

2.Tlang hmun a chengza ho,

    Lengzawngte lungawina hmun-

    Tlangmi’n nuam tin a chenna hmun.

    Phochhuahin awm se,ramtin ah.

3.Hmarchhak ram bial te mai hi,

   Hnam hrang awm dial,hnamzia dai ngai lo;

   Pipu zia dai lo,rilru hmunkhatin,

   Suihlung rual zain,ram tin ah.

4.Insuihkhawmin hnam hrang hrangte,

   Inlungrualin-phai lal selna hnutiang chhawnin;

   Thiamna,chhelna-neiin,hmachhawp siamin,

   Thangchhuakin-malsawmna niin,ram tinah.

Hringnun hmachhawp

Ka duhdan in thil zawng zawng a thleng lova,

Ka duhdan vekin thil ka thlen tir thei lo;

Damna ka duh a,

Dam tumin ka nung si lo.

Lawmna famkim neih ka tum a,

Lawmna famkim thlen ka tum si lo.

Ngaihsan nih ka duh a,

Ngaihsantlakin ka nung si lo.

Zahawmna ka duh a,

Zahawmna ka thawkchhuak  thei si lo.

Tlawmngai nih ka duh a,

Tlawmngaih hun ah ka pha leh si.

Malsawmna dawn ka duh a,

Malsawmtlakin  ka nung si lo.

Changkan ka duh a,

Changkan ka tum dan a dik si lo.

Hringnun zinkawng ah hian thunei ber nih duh si,

Thuneihna famkim la ngam si lovin,

Nun dazat tak hian hmachhawp ka siam fo thin.